LA MADONA DE MONTE BERICO, NOALTRI VENETI SEMO FORTUNADI CHE LA NE VOJA BEN.

De Agostino Venturini, veneto de Vicensa, che abrasso, anca par quel che el scrive qua.

Capita lungo la strada de la vita de perdarse un poco par la via, de desmentegar che le bone abitudini che cuei che ga la me età, (presto setanta ani… Ma no ste dirghelo a nisun!), disevo le bone abitudini che ne gavevà dà le nostre mame e le nostre none. 

No so voialtri, ma mi gavevo me nona materna che la stava ne la basa campagna trevisana, visin a la Piave, dove che el fiume xe largo chilometri, le Grave de Papadopoli. Distese a perdita de ocio de tonde piere de fiume de tute le dimension e de tuti i colori. 

Un posto dove de istà xe un caldo bestia, le sigale le te insordise. Umidità e zanzare de istà, e de inverno nebia e brosa che coverze i campi come se la fuxe neve. Case base, fontane a geto continuo, fossi drio le strade bianche pieni de rane che canta e siese piene de polvare. Eco, me nona la me ga insegnà la religiosità tipica del popolo veneto, che ringrasia el Signor par cuel che ne dà e el xe solidale co tuti cuei che ga bisogno. 

Dopo come ca disevo, el lavoro, la vita spasemà, la sità, me ga fato desmentegar cuel che gavevo imparà. Ma el conto riva sempre, prima o dopo. E co taca le robe a ndar roverse, speso le xe una drio l’altra… La salute te lasa a pie, e te riscoversi anca la religiosità che to mama e to nona te gaveva insegnà. Cusì dopo ani de salute e bon lavoro, me so malà. El mal del secolo, che col ne toca el ne spaventa tuti, parchè se pol morir e ,soratuto, se pol anca tribolar par morir.

La me xe ndà ben, e go vosudo desfar el me voto a la Madona de Monteberico. So partio a pie da casa, no un granchè, vintisincue chilometri, e so ndà a catarla. Xe veramente sta come ritrovar la mama. La Madona de Monteberico la xe diversa da tute le altre Madone che go visto, sia nei cuadri che ne le statue. La xe na Madona co un volto rotondo, do bele ganasse rosa, i oci soridenti, la ga proprio le fatesse de na dona veneta. Soto el so mantelo, tegnuo verto co le so man, xe racolte e protete sete picole figure. No la mete in sogesion, la te fa sentir casa, la someja proprio na mama. 

So tornà ancora tante volte. Specialmente in cuesti tre ultimi ani insieme a la me Siora. Parchè sto giro ghe ga tocà a ela: un seno, e do mesi polmoni. Sinque interventi, trentacuatro chemioterapie. Un bordeo de visite, esami, prelievi. Ma la Madona de Monteberico la ne ga jutà anca sta volta. 

Noialri veneti semo fortunà che la ne voja ben. Chissà, forse tuta la religiosità de la Serenixima la dà fruti ancora deso, anca se xe passà scuasi sentosetanta ani. San Marco, San Luca, Sant’Antonio da Padova, la Madona in tute le so forme e co tuti i so nomi, a scomisiar da la gloriosa Madona del Rosario che ricorda Lepanto e la vitoria sui Turchi. 

Chissà cosa che la pensa la Madona de Monteberico de tuti i musulmani che riva ogni dì, che dispresa la nostra religion, che spaca i simboli de la nostra cristianità. Mah… La Madona la xe sicuramente bona, ma no penso che la sia bonista.

In te sti ani fin che la me Siora la faseva le chemioterapie o la jera soto operasion, pasavo el tempo disegnando. Co le vignete che go fato me piasaria far un libreto che raconta la storia de sti malani, par regalarlo ai dotori e ai infermieri che se ga dedicà a noialtri. El bon umor juta a guarir e un soriso pol servir a smorsar la tension. Ve regalo le ultime do.