D1: Di uno, el 155 prosegue £e riflesion de un Veneto ne £a Catalogna ocupada

In tełevixion - finche magno pena svejà - el gobierno el dixe che 'l ga aplicà ła łeje.
"Aplicar ła łèje. Cumplir la ley". Cuando che mi èra picenin, tuti i discutea del 144 el nùmaro eròtico. El 155 el xe el nùmaro de ła perversion giurìdica. Co l'art.155 el vècio Stato el ga meso in prexon zente ełèta e paçìfica e 'l ga deçixo de far łe votaçion cuando che 'l vol, come che 'l vol e mandando in prexon i candidai scòmodi.

Ma i Catałani i riese a rìdarghe sù. Sentèndome parlar catałan i schèrça fra de łuri, contando chi che xe independentista e chi nò. Trancuiłi, rispetando łe idee. "Altro che łe divixion che dixe el gobierno", penso. I Catałani i mantien ła calma e ła democraçia.

Col sol, el panorama l'è cuel de senpre. Munti de tèra dura, cołor roso che i va zo al mar. Ndove che finise łe çità, taca i bòschi e i sasi. Par strada cuà e là se vede i manifesti de ła canpagna ełetorałe. Cuaxi senpre de candidai unionisti. Una, in particołar ła ga el slògan Ahora si votaremos, Dèso sì che votemo.

"Pecà che sta bèła dòna, che ła xe intełijente, l'àbia sielto sto slògan cuà" - penso. Cusita, pare che el vero votar el sia ła votaçion fata soto łèji speciałi e co un Presidente costreto a star in Bèlgio par no vegner arestà dai unionisti e parfin copà. In Itàlia no i ło sa mìa: uno del gobierno de Madrid el ga avertio el presidente catałan che 'l podaria finir fuxilà come n'altro Presidente catałan copà dai franchisti ani indrio. Terzo mondo in Europa.